Evnið í Fregnartænastuni hesa vikuna snýr seg um útlendska arbeiðsmegi, tær avleiðingar sum standast av, at Útlendingastovan ikki hevur heimild at krevja revsiváttan, og hvat kann ella má gerast frameftir fyri at betra um og tryggja støðuna í Føroyum.

 

“Tað kann fáa avleiðingar fyri summar útlendingar, sum ikki megna at lúka nýggju krøvini,” sigur Bjarni Kárason Petersen, landsstýrismaður í lógarmálum við ábyrgd fyri útlendingamálum, í nýggjastu partinum av Fregnartænastuni. Sambært landsstýrismanninum væntar hann at fáa politiska undirtøku fyri at herða krøvini til tilflytarar, sum koma til Føroya at arbeiða. Millum annað er upp á tal at krevja revsiváttan frá øllum útlendingum, sum ynskja at starvast í Føroyum.

Men ein slík broyting kann eisini hava avleiðingar fyri teir útlendingar, sum longu eru í landinum og eru komnir gjøgnum Fast Track ella líknandi skipanir undir gomlu og linari krøvunum. “Um teir ikki megna at lúka nýggju krøvini, so verða teir sendir av landinum aftur,” staðfestir landsstýrismaðurin í nýggjasta partinum av Fregnartænastuni.

 

Ein vaksandi avbjóðing?

Frihedsbrevet hevur seinastu dagarnar víst á, at fleiri fólk, sum eru komin til Føroya umvegis fyritøkuna Norcrew, hava framt fleiri brotsverk í Føroyum, og at ein arbeiðsmaður enntá hevur sitið 15 ár fyri morð í Póllandi.

Les greinarnar her :

 

Sambært Sabinu Poulsen, sum er úr Póllandi og hevur búð í Føroyum í 18 ár, so er tað stórur munur á fólkunum, sum koma til Føroya at arbeiða í dag, samanborið við bert fáum árum síðani. Hon greiðir í nýggjastu partinum av Fregnartænastuni frá, at hon í nógv ár hevur arbeitt sum tulkur fyri almennar stovnar og fyri privatar persónar. Sambært henni eru útlendingarnir, sum nú koma til Føroya, nógv verri fyri fakliga enn áður. “Hetta er eitt tekin um, at tað er okkurt galið í skipanini,” heldur hon.

Lutfallið er enn tað sama

Nógv prát hevur verið um útlendingar kring landið. Serliga aftaná fótbóltsdystin millum Føroyar og kroatiska liðið Hajduk Split, har viðhaldsfólkini hjá kroatiska liðnum alvorliga gjørdi um seg á Havnargøtum.

Løgmaður, Aksel V. Johannesen, tykist vera upptikin av viðurskiftunum bæði hjá og kring útlendingar í Føroyum. Sama skili sæst hinumegin ásina, har Beinir Johannesen, formaðurin í Fólkaflokkinum, júst hevur sett landsstýrismanninum í lógarmálum ein grein 52-spurning um Fast Track-skipanina, og hvat skal til fyri at kunna krevja reina revsiváttan frá umsøkjarum.

Men sambært Katrini Thorsvig Hansen, høvuðsákæra, so er lutfallið millum útlendingar og brotsverk neyvt tað sama, sum áðrenn Fast Track-skipanin gjørdist virkin.

“Í og við at tað eru fleiri útlendingar í Føroyum, so síggja vit fleiri útlendingar, sum fremja lógarbrot, men út frá hesum haldi eg ikki, at mann kann siga, at talan er um ein øking,” sigur Katrin Thorsvig Hansen í nýggjasta partinum av Fregnartænastuni.

Tú finnur røðina á appini og heimasíðuni, í báðum førum undir “poddvarp”